Mat 6 | KMU | STEP | YisasiꞋa mage huno hu-maine “Havigu tamakaya veaꞋmogami amaufima kanale kava nehisageꞋya ‘NageteꞋya kanale kano maine.’ huꞋya hisae.” hutama nehae. Ani kavala hisayana anonatamia hai ali-mainagi ikapinaga mainea NelamafaꞋa kanale kava haya yafe anonatamia otamamigahie.

Matthew 6

YisasiꞋa nagoꞋamogami amaya hisuna auꞋava yafe hu-maine.

1 YisasiꞋa mage huno hu-maine “Havigu tamakaya veaꞋmogami amaufima kanale kava nehisageꞋya ‘NageteꞋya kanale kano maine.’ huꞋya hisae.” hutama nehae. Ani kavala hisayana anonatamia hai ali-mainagi ikapinaga mainea NelamafaꞋa kanale kava haya yafe anonatamia otamamigahie.

2 Ani yafe tamakaya kafuma hisaya veala amaya hutamama amamigahena ala kefiti keha keha hutama oꞋamamitama kesi ako hutama amamiho. NagoꞋa vagala vayaꞋmoꞋya mono nopiꞋene kategaene “VeaꞋmoꞋya tageteꞋya ‘Kanale kava nehae.’ huꞋya takia alisaga hisae.” huꞋya keha keha huteꞋya vaya amaya nehayanagi nagaya tamagelafa huꞋna tamaha-nepauve kanale anonaꞋamia hai ali-mainayanagino Anumaya KotiꞋa nago yana oꞋamamigahie. 3 Kagaya kafuma hisaya veaꞋma amaya hugahena tamaga kayamoꞋa hauga kayamo hisia yana oꞋagesigeka kesi momaya huo. 4 Kesi ako huka veaꞋmoꞋya onagesagi huka amaya hisanana ani yakaꞋa Anumaya Koti, NegafaꞋa, kesi kavaꞋma nehaya yana neꞋagea kanomoꞋa age-maineanagino kanaleꞋya huno anonakaꞋa kamigahie.

YisasiꞋa nunamu hisaya auꞋava yafe hu-maine.

5 Nunamuma hutama havigegahena vagala vayaꞋmoꞋya nehaya kava hutama Anumaya Kotina havi-okeho. Ani vayaꞋmoꞋya mono nopiꞋene ka agegayaleꞋene “Muki veaꞋmoꞋya tagesae.” huꞋya hetiꞋya Anumayamotega havinegae. Nagaya tamagelafa huꞋna tamaha-nepauve vayaꞋmoꞋya anonaꞋamia hai ali-mainae. 6 Ali-mainagi kagaya oꞋagesaya kava huno mainea Nelafana Anumayamotegama havigegahena nokafinaga fita ki-maleteka maineka falakika havigesanageno NegafaꞋa kesi kavaꞋma haya yama neꞋagea kanomoꞋa ani yana ageteno anonakaꞋa kamigahie.

7 Nunamuma hugahena Anumayamo kema nohaviya veaꞋmoꞋya havinegaya kavala hutama kasagoꞋya afa keyaga hutama havi-okeho. Ani veaꞋmoꞋya ayaꞋaya nunamu ke nehuꞋya mage huꞋya amakesa nehaviye “AyaꞋaya ke huta havigesunageno havigahie.” huꞋya nehae. 8 Nehagi amakaya nehaya kavala amakave omaleho. Nelamafama havi-oketama maiya kanafina nago yatamima omalene hutama haya yatamia ago havimaineafe nagoꞋene tutu hu-oꞋateho. 9 Anumayamotega havigenutamahena mage hutama havigeho “Ikapinaga mainana Nelafaga kagai kagimoꞋa alu aotage huno hanesie. 10 Kava yagaisana kanamoꞋa efalote hisie. Kahaisia kavala ikapinaga nehagi mopaleꞋenena kahaisia kavala hisae. 11 Meni kanafina nesuna kavela tamio. 12 Tagaya havi kavaꞋma hu-la-tenaya veala aige amateta kefo yaꞋamia atale-ma-tona kava huka kefo yatia aige-tateka atale-lato. 13 Kana yapiꞋene SataniꞋma aye-lavataga hisia yapiꞋene tavaleka otato. SataniꞋa ‘Kefo kava hiho.’ hunoꞋma hu-la-tesigeka tahaꞋmaika tavalesaga huo.” huno hu-maine. 14 Huteno mage huno hie tamakaya havi yama hu-lamatenaya veala aigeꞋama-tetetama kefo yaꞋamima atale-ma-tesayana ikapinaga mainea NelamafaꞋa aniꞋa huno kefo yatamia aige-tamateno atale-lama-tegahie. 15 Atale-lama-tegahigi tamakaiꞋma ali-havi yama hu-lama-tenaya veafena aigeꞋama-tetama kefo yaꞋamima atale-oꞋama-tesayana ikapinaga mainea NelamafaꞋa aniꞋa huno kefo yatamia aige-tama-teno atale-otamategahie.

YisasiꞋa kaveꞋma monesiya yafe hu-maine.

16 Tamakaya Anumaya Kotitegama havigegahena kavela mositama mainutama tamaugosa kalaguꞋnagu ohiho. Vagala veaꞋmoꞋya ani kava huꞋya amaugosafina hapaene taꞋnefaene faleteꞋya mage nehae “VeaꞋmoꞋya tageteꞋya kaveꞋma mosi-mainona kavala tagegahae.” huꞋya nehayanagi tamagelafa huꞋna tamaha-nepauve naꞋa kava nehaya veaꞋmoꞋya anonaꞋamia hai ali-mainae. Tamakaya aniꞋa kavala ohiho. 17 Tamakaya Anumayamotegama havigegahena kaveꞋma mositama nemainutama titeti tamaugosa alitama masavema falesayana mukiꞋa veaꞋmoꞋya kaveꞋma mosisaya yafena ohavigahagi mai falakino mainea NelamafaꞋa falakino hanea yana agaiꞋage neꞋageafe anonatamia tamamigahie.

Kanale ya alitalu hisaya yafe hu-maine.

19 Monetamiene afenoꞋyatamienena ma mopale halaꞋya ohiho. HalaꞋya hu-malenesageno toto ayeno hakaꞋnomoꞋya ali haviya higeꞋya veaꞋmoꞋya notamifi haiꞋya ani yatamia musufa aligahae. 20 NaꞋa hugahagi ma mopafi yafena tamakesa havi havi ohutama haenagama ikapinaga kanale yama alisaya yafe meni kanafina Anumayamofe tamakesa havi havi hutama maiho. Ikapinaga mukiꞋa yama malesayana totona ayeno okasaligahie. HakaꞋnomoꞋa ali haviya ohugahie. NagoꞋa musufa veaꞋmoꞋya ani kumatela musufa yana ohugahae. 21 Muse yatamima malenesaya kumatefe tamakesa havi havi hutama ani kumate umaigahae.

Taulaga Taugafamona kaꞋniꞋa hane.

22 TamaulagamoꞋa tamakupinaga aye halesia lamu hane. TamaulagamoꞋa kanale yama huno agesiana tamakupinaga ai-hale-mainegi tamaulagamoꞋma kefo yama agesiana tamakupinaga hani-ki-maine. Ai-hale mainesia yamoꞋa tamakupima asu hisigenoꞋa hani kiteno ala hanikefa kino aye-talako hu-maine.

Tole kanolatatega nagoke kanomoꞋa aliꞋyana oꞋaligahie.

24 Nagoke kanomoꞋa “Tole kava kanolatamo aliꞋya kanoꞋania maisue.” huno ohisie. NaꞋama hisiana nago kava kanomofena “Nahaiya kano mainane.” huno hu-tegahianagi nago kava kanomofena “Hai vaiteno naipa nagata aiya kano mainane.” huno hugahie. Nago kava kanomona aguꞋa amiteno nago kanomofena “Falote onahaiya kava nehane.” huno hugahie. Tamakaya aniꞋa hutama Anumaya KotifeꞋene moneheꞋenena ali lokaeꞋana “Kava yagai-natesaꞋe.” hutama ohiho.

Kalagi aitama tamakesa havi havi ohiho huno hu-maine.

25 Ani yafe nagaya tamaha-nepauve kanaleꞋya hutama maisaya yaꞋene kave nesaya yaꞋene ti nesaya yaꞋene tamakesa havime havime oꞋviho. Tamaugafale kena failisaya yafeꞋenena tamakesa havi havi ohiho. Kave neyana aifa letale yanagi tamahaimula kanaleꞋya hutama maisaya ya hane. Kena fai-lisana yana amegale yanagi veaꞋnea tokiyaꞋage ya mainae. 26 HaleꞋyama vaiyatete nehaya namayaga ageho. Amakaya avina yana nofaiye. Kavela hoyafinagati aliꞋya nopina mo nomalagi ikapinaga mainea nelamafaꞋa kavela neꞋamamigi tamakaya Anumaya Koti aulagafina namayaga amakasetama mainaya veaꞋne mainayafe tamakaiꞋenena kava yakai-lama-tegahie. 27 Tamakaipitila nago kanomoꞋa “OfaliꞋna nagoꞋene maime maime haigahue.” huno tokiyaꞋage agesama havisiana anima havisia katela hanaꞋa huno falote hugahie? AꞋao falote ohugahie.

28 NaꞋa higetama kenatamihena tamakesa havi havi nehae? Ageho talapinaga vilasiyamoꞋya haiꞋya ausea nehae. AliꞋyana aliꞋya kenaꞋamia talo huꞋya fai-noꞋaligi kanale kenaꞋamia hanegeꞋya mainae. 29 Nagaya tamaha-nepauve nayoma mainea ala sauve kanotamia SolomoniꞋa kanale kenaꞋa fai-lianagi ma vilasiyamoꞋa kanaleꞋya huno agase-maine. 30 Tala yana meni kanafina hoyafina haneanagi ega hataga huꞋya atafi kae-talegahagi Anumaya KotiꞋa ani tala yana kava yagaigeno kanaleꞋya huno hanegi tamakaya mukiꞋa veaꞋmogatama nagaifena tamakupi maletama tamametitia osi kanoꞋa nehayanagi Anumaya KotiꞋa aniꞋa huno tamakaila kenatamia alino hilato hu-lamategahie.

31 Ani yafe “KaveꞋene tiꞋene na ya negahune?” hutama tusiꞋa tamakesa havi havi ohiho. “Na kena fai-ligahune?” hutama tamakesa ohaviho. 32 Ani augafa yafena Anumaya Koti kema nohaviya veaꞋmoꞋya amakesa havi havi huꞋya nemaigi ikapinaga NelamafaꞋa nesaya yaꞋene kena fai-lisaya yaꞋenefena ago havimaine. 33 Havimaineafe tamakaya hagotetama Anumaya KotiꞋma kava yagaisia kumate visaya yafeꞋene agaiꞋama nehaiya fatago kavaꞋma hisaya yafeꞋene tamakesa havi havi hisayana Anumaya KotiꞋa ani yaꞋene mukiꞋa kavetamiene kenatamienena tamamiteno ani kumatela tamavaleno tamategahie. 34 NaꞋa hu-maineafe “Ega hanaꞋa hugahune?” hutama tamakesa ohaviho. Egama efalote hisiana tamakesa havi havi hisaya yaꞋenena efalote hugahie. Nagoke yupa falote hisia kana yana ani yupa kanoꞋage tamakesa haviho.